سر الكرش

بعضِنا بيلاحظ وجود كرش صغنون و مدور للطفل بالذات في مراحل الطفولة المبكرة و بيكون مصدر قلق للأهل بالذات لو صاحب الكِرش بنوته

و للسبب دا .... لازم نِعرف إن وجود الكرش في سن الطفولة المبكرة ليه أسباب مرتبطة بتكوين الطفل التشريحي ... بمعنى :-

أولاً :
المعدة بتكون موجودة داخل البطن في خط أفقي و بالتالي بتدي للبطن الشكل المدور و على عمر سنتين بيبدأ وضعها يتغير و بتاخد الشكل الرأسي و مع التغير دا بيبدأ شكل البطن يبقى مسطح

ثانياً :
الكبد في مراحل الطفولة المبكرة بيكون كبير بالنسبة لحجم الجسم ( و دي حاجة طبيعيه جدا ) و بالتالي بيشغل حيز كبير من البطن و بيديها الشكل المدور الجميل دا و مع التقدم في العمر حجم الجسم بيكبر و بيستوعب حجم الكبد و شكل البطن بيتغير .

ثالثاً :
الأطفال عكسنا لما بناخد شهيق بطننا بتدخل لجوه ... هما على العكس الرئه بتتملي هوا و بتضغط على الحجاب الحاجز و بالتالي بيضغط على البطن و مع الشهيق البطن بتطلع لبره و بيبان شكل الكرش

رابعاً :
الجزء السفلي من العمود الفقري في الطفولة المبكرة بيبقى منحني للأمام شوية و دا بسبب ضعف عضلات الأطفال في السن دا و بالتالي الطفل بطنه بتطلع لقدام على شكل كرش صغنون .... و مع الوقت عضلات الطفل بتقوى و بتشد العمود الفقري في شكل مستقيم و بالتالي البطن بتتغير للشكل المسطح ..

و ممكن شكل البطن المدور أو الكِرش يستمر مع الطفل لغاية سن دخول المدرسة و بيختفي تماما بالتدريج

طيب إمتى نخاف و نقلق ؟؟!!

✋لو ظهر فجأه و مكانش موجود قبل كدة مع وجود حرارة أو قئ أو إمساك لإن دا ممكن يكون من علامات الإنسداد المعوي ...

✋ لو مصاحب بنزول في الوزن و قلة نشاط و إسهال مزمن و طفح جلدي و التهابات متكررة في الصدر و دا من علامات حساسية اللاكتوز أو بروتين الألبان....

✋ لو البطن دائما مشدودة و مش طرية عند الضغط عليها و دا بيكون سببه غازات و امساك مزمن .....

و طبعاً مفيش مانع إنه لو عندكم أي قلق من شكل بطن الطفل ترجعوا للدكتور يطمنكم ...

إنما لو الطفل طبيعي تماماً و نشيط و وزنه كويس مفيش داعي للقلق و كل اللي مطلوب منكم الإستمتاع بالتفاصيل اللذيذة دي اللي هتختفي في يوم من الأيام و تبقى ذكرى جميلة تضحكوا عليها لما تشوفها في صورهم ... âپ¦