إقدام طبيب حديث التخرج على الانتحار...
قرأت مقال عن
لماذا يكتئب الاطباء ؟؟ ..

و ده ملخص لبعض النقاط .

الطبيب فى الأصل... انسان شاطر جدا جدا..بس من خلال الورق و المذاكره و الحفظ ...الخ.... و بس كده.و غالبا مش اكتر من كده

ولكن ....
بمجرد ما يدخل المنظومه الطبيه ...هناك كثير من العوامل الداخليه والخارجية بتغير نمط حياته و تفكيره و تصرفاته و كمان ردود افعاله
...
بعض النقاط فى حياه الطبيب ..و التى تؤدى إلى الاكتئاب
...
1-الطبيب عنده النجاح اهم من المتعه
من ايام ما كان فى ثانويه عامه..لو فى مباراة مهمه بين الاهلى و الزمالك مثلا قبل الامتحان بيوم ....تقريبا معظم الاطباء مش هيتفرجو على الماتش لان فى امتحان مهم ....فاستطاع ان يلغى متعته مقابل نجاحه ......فى حين ان معظم زمايلنا من الكليات التانيه ممكن بيتفرج على الماتش حتى لو مش هيراجع الماده..
حضور فرح...سبوع ...قعده عائليه
القصه دى بتصاحب الاطباء حتى معظم حياتهم.... ( المتعه و عدم التكريس) ..............
و المتعه سر من اسرار الاقبال على الحياة
....
2- سقف الطموح عالى :
الطموح حاجه جميله و بنحاول نخلى الناس كلها عندها طموح بس كل شئ يزيد عن حده ينقلب لضده احيانا
...
3- دائما فى مقارنه :
الدكتور من و هو فى المدرسه متعود على المقارنه و المنافسه ( مين هيطلع الاول على الفصل ) ...
فى الكليه
حتى مع المرضى و المقارنة بين الزملاء.........
و المقارنه مهلكه نفسيا
...
4- ذو العقل يشقى فى الحياة بعقله :
زى ما قال الشاعر ....معظم الاطباء مستوى الذكاء بتاعهم كويس..و أسلوب المنهج الطبى يهتم دائما بتنميه قراءه الواقع و استشراف المستقبل
يستخدم المتاح لمعرفه المجهول
و بالتالى مجرد ما يفكر فى الحياه بيكتئب اكتر
.....
5- البيئه المحيطه بالطبيب لوحدها تدعو للاكتئاب : صاحب جميل الروح تصبك عدوى جماله .....تخيل العكس بقى ان حضرتك شغلك كله عباره عن ناس عماله تتاوه و دموع و صريخ و تحمل خبر وفاة لاهل مريض ...الخ. الموت هو الحقيقه القائمه أمامه معظم الوفت
....
6- فكره النبطشيات..و ان اى تليفون غالبا جايب معاه مصيبه . On call
: عايز تقتل اى انسان معنويا و نفسيا طول عمره و تلغبطله نومه مدى الحياه .....اديله سنتين تلاته يشتغل بعد الساعه 12 بليل
.....
7- القرارات المصيريه ولازم فى خلال دقائق او ثوانى :
الطبيب كل يوم بياخد قرار كل حاله مريض عباره عن سؤال عايز اجابه ....مش بيشتغل زى الاستاذ ( ختامه ) وظيفته بس انه معاه الختم بتاع الجمهوريه بيمضى للناس...او يراجع أوراقهم..و إللى مايخلصش النهارده ممكن يخلص بكره
....
8- الدارسه المستمره و الامتحانات طويلة الامد :
فكرة انك تبقى عندك 40 سنه و لسه بتذاكر و بتروح الامتحان خايف ...مقابل ان كل الناس خلصت دراسه عندها 22 سنه مرعبه ...و بعدين لما 40 سنه تاخد الاجازه الكبيره .....هتروح فين ( الملاهى مثلا )...حتى بعد الشهادات العاليه
العلم لا يتوقف
....
9 - العزله عن المجتمع :
عدد ساعات شغل طويله بتخليك معظم اليوم اما فى العياده اما شايل نبطشيه 24 ساعه.....
و من اسباب السعاده فى الحياه الارتباط بالاهل و كذلك فهم الناس ....اسوء شخص اجتماعيا ...
تلاقى الدكاتره اكتر ناس كمان بيضحك عليهم من اى صنايعى او صاحب مهنه...و دا بيدايقهم جدا لان بيحس انه ذكى و مع ذلك بيضحك عليه كتير
...
10- طبيب العائله المقصر معهم دائما : غالبا اكتر واحد العيله بتساله عن كل حاجه حتى لو قولتلهم ان حضرتك تخصص جوده او مكافحة عدوى ....انت فاهم فى كل حاجه و لازم تيجى معانا عند كل دكتور و تبقى فاهم ....و غالبا هتطلع مقصر بردو فى الاخر
....
موضوعات زى
دى مهنه ساميه .....
و خلقت بلسما فلا تشتكى..........

كلها بتهون على الطبيب ......احيانا

بس من الاخر و فى الاخر هو.... بشر ...

ده مجرد رصد ....لواقع موجود ...محسوس...من أطباء و زملاء كتير

انا ما عنديش حل ذهبى ..و لا جذري

بس يمكن الصبر على الواقع و تجديد النيه و التماس محبه الناس و دعواتهم يكون فيها بعض العزاء...

ان لم تفعل ما تحب
فحب ما تفعل
....