- يا أستاذ محمد أنت بتتكلم بقالك نص ساعة وأنا مش فاهم برضه انت عايز ايه !!
- يا دكتور ازاى بس ؟؟ يعنى بعد كل اللى حكيتهولك عنها ده وبتسألنى السؤال ده ؟؟
- أيوه !! بعد كل اللى حكيته ده ... انت عايز ايه فى الآخر ؟؟؟؟
- عايز أسيبها طبعا !!

- خلاص سيبها !!

ينظر الرجل بكل دهشة للطبيب الذى ينصحه بتطليق زوجته بكل سهولة ويسر ولا مبالاة !!

- انت بتبصلى كده ليه ؟؟
- ايه يا دكتور اللى انت بتقوله ده !! بالبساطة دى بتقوللى سيبها ؟؟
- يابنى مش انت اللى عايز كده !!
- أيوه يا دكتور مانا عايز .... بس المفروض أنا لما أقول كده أنت تعقلنى وتهدينى وتقوللى اخزى الشيطان طب نحل الموضوع طب نتفاهم طب تعتذر لك ... دى مهما كان مراتك وأم عيالك !! تقوللى خليها ... مش سيبها !! تقوللى نحاول نصلح الأمور ونضبط الدنيا !!
- انت عايز تصلح الأمور وتضبط الدنيا ؟؟
- أنــــــا ؟؟ ............ أنا عايزأكسر دماغها !!
- خلاص طلقها ....
- ايه ده يا دكتور !! بالبساطة دى ؟؟ بعد كل السنين دى كلها والعيش والملح ؟؟ يعنى مفيش أمل ؟؟
- خلاص خليها ....
- أخليها ازاى يا دكتور ؟؟ بقى بعد كل اللى قلتهولك ده وبتقوللى أخليها ؟؟ .... طب بذمتك موقف صينية البشاميل اللى حكيتهولك ده مش يحرق الدم ؟؟
- خلاص طلقها ...
- أطلقها ازاى بس يا دكتور ؟؟ ..... والأربع عيال الغلابة دول يعملوا ايه ؟؟ ... ما ينفعش الواحد يبقى انانى برضه كده ولازم يفكر فى العيال
- خلاص خليها ....
- أخليها ازاى بس ؟؟ ... ده أنا كل ما أفتكر موقف الغسالة الكهربائية اللى حكيتلك عنه أوالموقف اللى حصل فى عيد ميلاد ابن أخويا بينها وبين مرات أخويا .... العفاريت تتنطط فى وشى !!
- خلاص طلقها !!
- ماهى المشكلة أن الطلاق حيفتح عليا صداع أنا مش أده الصراحة !! صداع من كل حاجة وفى كل حاجة !! ... وأنا الصراحة مش حمل الصداع ده ....
- خلاص خليها ...
- أخليها ؟؟ أقسم بالله العظيم يا دكتور أن ساعات بيبقى هاين عليا أفتح دماغها وأشقها نصين !! حاولت معاها بالحسنى مانفعش بالشدة مانفعش ... حاولت كل حاجة لكن هى مافيش فايدة فيها ... هوبليس كيس !!
- خلاص طلقها ....
- يادكتور العشرة ماتهونش غير على ولاد الحرام ... .وانا ابن حلال بصراحة .... واذا كانت تستاهل فتح دماغها ... فهى برضك فيها حاجات كويسة الحق يتقال عشان مابقاش مفترى .... مهما كان بتحب العيال وشايلاهم ومش حنسالها برضه أما وقفت جنبى فى أول جوازنا وباعت ميراثها عشانى ... بس أنا الشهادة لله رجعتلها كل فلوسها على داير المليم وزيادة كمان آه !!
- خلاص خليها ...
- هى بس لو تبطل عنادها ودماغها الناشفة الجزمة قديمة دى ؟؟ يا ساتر .... انا كل ما أفتكر موقف المصيف اللى حكيتهولك الدنيا تسود فى وشى !!
- خلاص طلقها ....
- بصراحة لأ .... حكاية الطلاق دى حتتعبنى أكتر مانا تعبان دلوقتى .... خلينى أكمل معاها وأصبر عليها ... وفنفس الوقت ححاول أصلح معاها الأمور على أد ما أٌقدر... لحد ما ربنا يهديها أو ياخدنى وأرتاح .... العشرة ماتهونش برضه .... وللا رأيك ايه يا دكتور؟؟
- خلاص خليها ...
- متشكر يا دكتور ... ونعم المشورة ... أيوه كده ... هو ده كلام الناس الفاهمة الكبارة ....الحمدلله أنى جيتلك واتكلمت معاك وفضفضتلك ... .الواحد غلط يتصرف من دماغه بس من غير ما يستشير أهل العلم والخبرة ... وانت منهم باذن الله ... أنا مش عارف من غيرك كنت حعمل ايه .... روح يا شيخ ربنا يخليهملك